काठमाण्डौ । परराष्ट्रमन्त्री प्रदीप ज्ञवालीले उपसभामुख चयनका लागि प्रमुख प्रतिपक्षी दलहरुले पहल लिनुपर्ने बताएका छन् ।
सभामुख सत्तारुढ दलको तर्फबाट भएका कारण सत्तारुढ दलले उपसभामुख लिन नपाउने संवैधानिक प्रावधान रहेको उल्लेख गर्दै उनले प्रतिपक्षी दलले नै उपसभामुखको विषयलाई अगाडि बढाउनुपर्ने धारणा राखे । बिहीबार संघीय संसद संसदीय सुनुवाइ समितिको बैठकमा प्रमुख प्रतिपक्षी नेपाली कांग्रेसकी सचेतक पुष्पा भुसालले उपसभामुख चयनमा ढिलाइ भएको भन्दै सरकारको ध्यानाकर्षण गरेकी थिइन् ।
जवाफमा परराष्ट्रमन्त्री ज्ञवालीले सभामुख सत्तारुढ दलको भएका कारण उपसभामुख एउटै दलको राख्न नमिल्ने र सभामुख पुरुष भएका कारण उपसभामुख महिला आवश्यक हुने बताए । तत्कालिन उपसभामुख शिवमाया तुम्बाहाङ्फेले राजीनामा दिएपछि १२ माघ २०७६ देखि उपसभामुख पद खाली छ ।
संसदमा सबैभन्दा ठूलो दल भएका कारण नेकपाले जसलाई समर्थन गर्छ उसैले उपसभामुख पद पाउने अवस्था छ । तर, नेकपाले कसलाई समर्थन गर्ने भनेर टुङ्गो लगाउन सकेको छैन । सभामुख र उपसभामुख फरक राजनीतिक दल र लिंगबाट हुनुपर्छ । फरक राजनीतिक दललाई उपसभामुख दिनुपर्ने भएपछि नेकपाले उपसभामुख निर्वाचन गराउन नचाहेको आरोप लाग्दै आएको छ ।
प्रतिकृया दिनुहोस